Jümmer wedder warr'n wi frogt, wat de Nam' "Liekedeler" bedüüt. Hier is nu also noch eenmal de Verklooren: "Liekedeler" is dat plattdüütsche Woort för "Vitalienbrüder", de Lüüd üm Klaus Störtebeker, wat de Freibeuter un Seeröver weer. Se delten allens to'n "lieken Deel". Un so maken wi dat noch hüüt, wi delen allens to'n lieken Deel, de Freud an uns plattdüütsche Spraak un an uns Leder.
Wi drievt uns "Unwesen" mit Musikmaken - un dat allens (un blots) op Platt. 10 CDs hebbt wi al opnahmen un verkopen se bi uns Konzerte oder noch ünner de Tel.-Nr. 04123/9 22 61 55 (Jörn Schröder).
"Liekedeler" gifft dat siet September 1989. Vörher hebbt wi Musik bi de Trachtengrupp "Ueterst End" maakt un wullen denn endlich op egen Fööt stahn.
Vun de ole Liddmaten is nüms mehr dorbi. Jörn is siet 1994 dorbi, Bert nu wedder, weer avers al vun 1995 bet 2005 dorbi, Gert is siet 2003 dorbi un Isving keem nu dorto. Mit dat Wesseln vun de Muskanten kreeg ok uns Musik en anner Klöör. Hüüt spelen wi mit Rhythmusgitarr, Akustikgitarr, Bass, Waldzither, Fleiten, Akkordeon, Keyboard un veel "Klöterkraam" för den Rhythmus.
Dusend Ideen hebbt wi noch in'n Kopp, de mit de Tiet all mal ruut wüllt. Veel Arbeit, aver ok veel Spaaß liggen vör uns in de tokamen Maanden, denn jeedeen Johr maken wi ok en Reeg vun Wiehnachtskonzerten, de uns sünnerlich an't Hart liggen.
Wi freit uns al op Joon Besöök bi een vun uns Konzerten (kiek na bi de Termine).
Freit Se sik ok! Bet denn!